Mamlaka ya Usimamizi wa Bima Tanzania (TIRA) kupitia Kanda ya Magharibi; imetoa elimu ya bima kwa wajumbe wa Serikali za Vijiji vinne ambavyo ni Ipole, Ugunda, Isonge na Mkole, vilivyopo Wilaya ya Sikonge, Mkoa wa Tabora, ikiwa ni sehemu ya juhudi za kuongeza uelewa wa wananchi kuhusu umuhimu wa bima katika kulinda maisha, afya na shughuli za kiuchumi.

Elimu hiyo imejikita katika Bima za Kilimo na Bima ya Afya kwa Wote, ambapo wajumbe hao walielezwa namna bima hizo zinavyoweza kusaidia kupunguza athari za changamoto zinazoweza kujitokeza katika shughuli za kilimo pamoja na gharama za matibabu kwa wananchi.

TIRA imetoa rai kwa viongozi hao kuendelea kushirikiana pamoja katika kufikisha elimu ya bima kwa wananchi, hususan katika maeneo ya vijijini, ili kuongeza uelewa na matumizi ya huduma za bima kwa ajili ya kujenga jamii yenye uwezo wa kukabiliana na athari za majanga na changamoto mbalimbali za kiuchumi.

TIRA, kwa Soko Salama la Bima