Mamlaka ya Usimamizi wa Bima Nchini (TIRA) kwa kushirikiana na wadau wa sekta ya bima wamechangia jumla ya shilingi Mil. 221 kwa Hospitali ya Benjamin Mkapa (BMH) kwa lengo la kusaidia kugharamia matibabu ya upandikizaji Uloto kwa watoto wenye ugonjwa wa Selimundu (Sickle Cell) na upandikizaji wa Figo kwa wananchi wenye uhitaji.

Akikabidhi hundi ya mchango huo kwa Mkurugenzi Mtendaji wa BMH, Kamishna wa Bima Tanzania Dkt. Baghayo Saqware ameupongeza uongozi wa BMH kwa ubunifu wa kuanzisha mfuko maalumu unaowawezesha wadau mbalimbali kuchangia fedha za kusaidia matibabu ya Figo na Uloto na kuahidi TIRA kuendelea kushiriki kuchangia.

“Mchango huu wa Mil. 221 umetoka kwa TIRA ambayo imewashirikisha wadau wake wa bima ambao kwa pamoja wamewezesha kukusanya kiasi hicho cha fedha, tutaendelea kuwaunga mkono BMH na awamu ijayo tutachangia zaidinya kiwango tulichochangia awaku hii” alisisitiza Dkt. Saqware.

Mkuu wa Kitengo cha Mahusiano TIRA Bi. Hadija Maulidi amesema kuwa mchango huo ni sehemu ya kuunga mkono juhudi za Serikali katika kuboresha Afya za Watanzania hususani kusaidia watoto wadogo wenye changamoto za ugonjwa wa Sickle Cell na kuwa mchango unaonesha sekta ya bima inajali Afya za Watanzania.

Nae Mkurugenzi Mtendaji wa Kampuni ya Bima ya Metro Bw. Amani Boma akiwakilisha wadau wa sekta ya bima amesema kuwa moto wa kampuni yao unatoa msisitizo wa kwenda pamoja na jamii na kufika mbali, kufanya makubwa zaidi kwa jamii (Together we will and go extra miles)

(Bi. Hadija Maulid - Meneja Majusiano TIRA ; akitoa ufananuzi wa watoa huduma wa bima walioishika mkono BMH)

Kwa upande wake Mkurugenzi Mtendaji wa kampuni ya bima ya Sanlam Allianz Bw. Julius Magabe amesema kampuni za bima zinaamini katika kurudisha kwa jamii kutoka kwenye kile kinachopatikana hivyo wataendelea kuiunga mkono serikali na BMH.

Akitoa salamu za shukrani, Mkurugenzi Mtendaji wa BMH Prof. Abel Makubi amesema kuwa wadau wa bima wamefanya jambo kubwa la mfano, hali inayoonesha wameguswa na matatizo ya jamii na kuahidi kuwa fedha hizo zitatumika kupandikiza uloto na figo kwa wenye uhitaji.