Mamlaka ya Usimamizi wa Bima Tanzania (TIRA) imesisitiza umuhimu wa matumizi ya takwimu rasmi na ubunifu wa kiteknolojia katika kuimarisha ukuaji wa sekta ya bima nchini.

Hayo yamesemwa na Kamishna wa Bima, Dkt. Baghayo Saqware, alipokuwa Mgeni Rasmi katika Kongamano la Tisa la Mwaka la Wanataaluma wa Takwimu lililofanyika katika Chuo cha Takwimu Mashariki mwa Afrika (EASTC), jijini Dar es Salaam, chini ya kaulimbiu “Transforming Africa through Data-Driven Innovation, Statistical Excellence and Emerging Technologies.”

Dkt. Saqware amesema matumizi ya takwimu rasmi yana mchango mkubwa katika kufanya maamuzi sahihi, kubaini fursa za uwekezaji na kubuni suluhu zinazoboresha huduma za bima. Ameeleza kuwa uwekezaji katika sekta ya bima umefikia takribani Shilingi trilioni 2.2, huku sekta hiyo ikikua kwa wastani wa asilimia 15 kwa mwaka.

Aidha, amesema TIRA inaendelea kushirikiana na EASTC katika matumizi ya takwimu kwa ajili ya kufanya maamuzi na kutoa mapendekezo ya kitaalamu yanayolenga kuimarisha sekta ya bima na kuchangia utekelezaji wa Dira ya Taifa ya Maendeleo 2050. Pia Amewahimiza wahitimu na wanataaluma wa takwimu kutumia maarifa na ubunifu wao kuibua suluhu zenye tija katika sekta ya bima, kwa kuzingatia weledi na uadilifu.

Kwa upande wake, Mkuu wa EASTC, Dkt. Tumaini Katunzi, amesema kongamano hilo ni jukwaa la kila mwaka linalowawezesha wanafunzi, wahitimu, wanataaluma na wadau wa sekta binafsi kubadilishana maarifa na uzoefu, pamoja na kuibua suluhu kupitia matumizi ya takwimu rasmi.