Mamlaka ya Usimamizi wa Bima Tanzania (TIRA) kupitia Ofisi ya Kanda ya Kati, imesisitiza umuhimu wa ushirikiano kati ya taasisi za Umma katika kukabiliana na vitendo vya udanganyifu katika bima.

Wito huo umetolewa leo Novemba 10, 2026, wakati wa mafunzo ambayo yamendaliwa na TIRA kwa wataalamu 80 kutoka taasisi mbalimbali za Serikali; katika ukumbi wa Ofisi za Makao Makuu TIRA Bima House, jijini Dodoma.

Akifungua mafunzo hayo kwa niaba ya Kamishna wa Bima Tanzania, Meneja wa TIRA Kanda ya Kati, Bw. Said Mpombo, amesema mafunzo hayo yamelenga kuwajengea uwezo Mawakili wa Serikali kutoka Ofisi ya Taifa ya Mashtaka, Wapelelezi wa Makosa ya Jinai na Maafisa wa Jeshi la Polisi kutoka Kitengo cha Usalama Barabarani kuhusu udanganyifu katika bima, viashiria vyake, changamoto zinazojitokeza pamoja na umuhimu wa ushirikiano katika kudhibiti vitendo hivyo.

Aidha, Meneja wa Udhibiti Udanganyifu wa TIRA, Bw. Okoka Mgavilenzi, ambaye alikuwa mwezeshaji wa mafunzo hayo, ametoa elimu kuhusu aina mbalimbali za udanganyifu katika bima, ikiwemo kughushi nyaraka, kuongeza thamani ya madai ya fidia, kutoa taarifa za uongo kuhusu vifo katika bima za vikundi pamoja na kutoa taarifa zisizo sahihi kuhusu ajali n.k.

Ameeleza kuwa vitendo hivyo vinaweza kusababisha upotoshaji wa taarifa zinazotumika katika uchunguzi na uendeshaji wa kesi, hivyo kuathiri upatikanaji wa haki kwa wananchi wanaostahili kulipwa fidia za bima.

Pia, Bw. Okoka amewataka wataalamu hao kuzingatia Sheria, Kanuni na Taratibu katika utekelezaji wa majukumu yao, huku akisisitiza umuhimu wa kushirikiana na TIRA katika kubaini, kuchunguza na kudhibiti vitendo vya udanganyifu katika sekta ya bima.

Naye, mmoja wa washiriki wa mafunzo hayo, Bi. Aziza Mhina kutoka Ofisi ya Taifa ya Mashtaka Wilaya ya Bahi, amesema mafunzo hayo yamekuwa na manufaa makubwa kwao kutokana na uwepo wa kesi zinazohusisha udanganyifu katika bima zinazowasilishwa katika ofisi zao. Amesema elimu waliyoipata itawasaidia kuongeza uelewa na ufanisi katika kushughulikia kesi hizo wakati wa utekelezaji wa majukumu yao.

TIRA, Kwa Soko Salama la Bima