Mamlaka ya Usimamizi wa Bima Tanzania (TIRA) imeendelea kuimarisha ushirikiano katika kuendeleza mpango wa “Mufti Bima Fund”, unaolenga kuwezesha wananchi, hususan wenye uhitaji, kupata huduma za bima ya afya.

Hatua hiyo imejadiliwa leo Oktoba 6, 2026, wakati TIRA ilipokutana na Mufti Mkuu wa Tanzania, Sheikh Abubakary Zubeiry bin Ally, katika Maonesho ya Tanzania Health Summit Expo yanayofanyika katika Ukumbi wa Mlimani City jijini Dar es Salaam.

Akizungumza katika kikao hicho, Meneja wa Uhusiano na Mawasiliano kwa Umma wa TIRA, Bi. Hadija Maulid, kwa niaba ya Kamishna wa Bima, ameeleza kuwa TIRA inaendelea kushirikiana na BAKWATA katika kuendeleza mpango huo kwa lengo la kuongeza fursa kwa wananchi kupata bima ya afya na kuwa na ulinzi wa kifedha wanapokabiliwa na changamoto za kiafya.

Naye, raisi wa Tanzania Health Summit, Dkt. Omary Chillo, alieleza kuwa maonesho hayo yanalenga kutoa elimu kuhusu masuala ya afya na kutoa fursa kwa wadau mbalimbali kukutana, kubadilishana uzoefu na kujadili namna ya kuimarisha huduma za afya nchini. Pia alimshukuru Mufti kwa kushiriki katika maonesho hayo.

Kwa upande wake, Mufti Mkuu wa Tanzania, Sheikh Abubakary Zubeiry bin Ally, aliwapongeza TIRA, BAKWATA na wadau wengine kwa kuendelea kushirikiana katika juhudi za kuongeza uelewa wa jamii kuhusu bima ya afya. Alisisitiza umuhimu wa kuendeleza elimu kwa wananchi ili waweze kufahamu nafasi ya bima katika kujilinda dhidi ya gharama za matibabu na changamoto nyingine zinazoweza kujitokeza.

TIRA, Kwa Soko Salama la BIma