Kamishna wa Bima, Dkt. Baghayo Saqware, ametoa msisitizo huo kwa sekta ya bima nchini; kuoanisha shughuli zake na Dira ya Taifa ya Maendeleo 2050 ili kuchochea ukuaji wa sekta na kuhakikisha huduma za bima zinakuwa jumuishi na kuwanufaisha wananchi wengi zaidi.

Dkt. Saqware ameyasema hayo leo; Septemba 24 2026, visiwani Zanzibar, wakati akifungua rasmi Mkutano wa Mwaka wa Jumuiya ya Washauri wa Bima nchini (TIBA), akiwa Mgeni Rasmi. Mkutano huo wa siku mbili unalenga kujadili masuala mbalimbali yanayohusu maendeleo ya Jumuiya hiyo na sekta ya bima kwa ujumla.

Akizungumza katika mkutano huo, Kamishna ameitaka TIBA kuhakikisha shughuli zake zinaunga mkono malengo ya Dira ya Taifa 2050, huku akisisitiza umuhimu wa sekta ya bima kujenga taswira chanya kwa jamii kupitia ulipaji wa madai kwa wakati, utoaji wa huduma bora na kuwahudumia wateja kwa utu.

Aidha, amesema Mamlaka ya Usimamizi wa Bima Tanzania (TIRA) itaendelea kushirikiana kwa karibu na TIBA katika kuimarisha Jumuiya hiyo na kuboresha miongozo na sera mbalimbali zinazolenga maendeleo ya sekta. Ameeleza kuwa mwelekeo wa TIRA ni kuhakikisha sekta ya bima inakuwa endelevu, inakua mwaka hadi mwaka, inazingatia maadili na inajitenga na vitendo vya udanganyifu katika shughuli za bima.

Kwa upande wake, Rais wa TIBA, Bi. Elinipa Elias, amesema Jumuiya hiyo itaendelea kujiimarisha na kushirikiana na wadau wa sekta ya bima ili kuboresha utoaji wa huduma na kuchangia maendeleo ya sekta nchini. Mkutano huo umehudhuriwa pia na viongozi mbalimbali kutoka TIRA, akiwemo Naibu Kamishna wa Bima, Bi. Khadija Said.

TIRA, Kwa Soko Salama la Bima